Konferensia Imprensa Kona-ba Kondisaun Setór Bee moos, Saude, Agrikultura no Edukasaun

Komemorasaun  Loron Mundiál Direitus Umanus importante tebes  atu ema hotu, liu-liu Nasaun Parte sira bele loke matan atu  halo reflesaun hodi realiza direitu sira ne’ebé nu’udar ema umanu iha, bele hetan liután atensaun no sira ne’ebé iha poder liu, hanesan Estadu atu prioritiza liután direitu sira ne’ebé  bele asegura no kontinua hadiak  ema nia moris loro-loron liu husi investimentu ida ne’ebé adekuadu hodi hatan ba moris di’ak sidadaun sira nian.

Kondisaun no Problema sira iha Munisípiu (Baucau, Viqueque, Ainaro, Aileu, Dili, Emera, Manufahi no Liquiça) Hanesan:

• Bee moos-Komunidade sira kontinua asesu bee posu no bee matan inklui problema sustentabilidade, sistema bee hirak ne’ebé mak harii ona tinan rua ba leten. Ezemplu: Suku Casa Komunidade uma kain 211 mak asesu bee matan, Suku Mulo, Aldeia Blehitu uma kain 103 mak kontinua asesu bee matan, Suku Estadu uma kain 354 mak asesu bee matan,

1. Saúde- Problema Aimoruk laiha, saneamnetu la di’ak, ambulansia laiha, ekipamentus no fasilidade no mós rekursu umanu limitadu, Ezemplu : Postu Saúde Estadu iha Suku Estadu Munisípiu Ermera la iha Aimoruk, saneamentu no fasilidade,
2. Edukasaun-Infraestrutura, Fasilidade, saneamentu, bem estar professor/a, kurikulum, merenda eskolar no dezafiu sira seluk-Ezemplu: Eskola EBF Zero 3 Uma Kiik ho Ho Ensinu Sekundariu Jerál Kalisa mak kondisaun sala ualu la to’o, bee laiha, merenda eskolar la la’o ho di’ak iha Suku Uma Kiik Munisípiu Viqueque.
3. Agrikultura: Irigasaun la di’ak, distribuisaun fini tarde, rai produtivu abandonadu, ekstensionista menus no tratór sira kondisaun avaria no alokasaun orsamentu ba diresaun Agrikultura Munisípiu limitadu-Ezemplu: Irigasaun Lugatu-Hatulelo iha Munisípiu Ainaro Suku Mau-Ulo at desde tinan 2010 to’o agora la hadia, Irigasaun Laen-Luan, Laun Kadoi, Fatunaru, Macil Cil, Direkede totál hektares 180 la iha irigasaun no komunidade uza irigasaun sistema tradisonal, Irigasaun Lue Golo natar ho luan 203 sei uza sistema tradisional, Kafe folin lad’iak. Iha SUku Samalari Postu Administrativu Baucau, irigasaun modo Buti ho sistema tradisional.

Ho problema hirak ne’e ami reprezenta Lideransa Komunitaria husi Munisípiu (Baucau, Viqueque, Ainaro, Aileu, Dili, Emera, Manufahi no Liquiça) inklui sira seluk ne’ebé mak ami la mensiona maibé enfrenta problema hanesan, husu Governu da-IX atu prioritiza ba setór fundamentu sira ne’ebé liga direita ho povu nia moris.

Ami rekomenda ;

• Setór Bee Moos ;

1. Husu ba Governu atu investe ba asuntu bee, Saneamentu no Ijiene-BESI liu husi Orsamentu Jerál Estadu-OJE tenke liu 3 % hodi materializa Progama IX Governu nian katak “asuntu bee no saneamentu labele adia tan”
2. Husu ba Parlamentu Nasionál Komisaun E atu apoiu Ministériu Obras Públika ho Ministériu relevantes sira seluk hodi diskute investimentu Orsamentu Jerál Estadu ne’ebé natoon ba asuntu Bee, Saneamentu no Ijiene (BESI) ba tinan 2024
3. Husu ba Parlamentu Nasionál Komisaun E ne’ebé trata asuntu Infrastrutura atu optimaliza liu tan servisu fiskalizasaun ba kondisaun asesu bee komunidade nian iha área urbana no área rurál
4. Husu ba Governu atu halo investimentu ida ne’ebé integradu no sustentabel ba polítika jestaun rekursu bee
5. Husu ba Governu atu halo alterasaun ba dekreitu lei numeru: 04/2004 atu prioritiza ba investimentu, melloramentu no asegura sustentabilidade sistema bee rurais liu husi fó insentivu ba Grupu Maneja Fasilidade-GMF

• Setór Agrikultura ;

1. Husu ba Nuno (IX) Governu Konstitusionál atu konsidera agrikultura iha alokasaun Orsamentu Jerál Estadu hodi mellora produsaun alimentár iha Timor-Leste;
2. Husu ba Ministériu Agrikultura no Peskas, atu halo monitórizasaun rutiña hodi haree besik kondisaun serbisu eksténsionista sira nian iha Suku sira;
3. Husu ba Governu atu tau atensaun ba kanaliza irigasaun ba to’o iha Suku, Aldeia no bairo sira ne’ebé mak komunidade sira hela ba
4. Husu ba Ministériu Agrikultura no Peskas, atu halo rekrutamentu tan ba pesoál eksténsionista sira hodi prensia ba Suku balu ne’ebé maká eksténsionista sei dauk iha
5. Husu ba Ministériu Agrikultura no Peskas, atu labele halo privatizasaun ba fini
6. Husu ba Kompana APC atu selu benefisiariu hirak ne’ebé kado/rehabilita kafe

• Setór Saúde ;

1. Husu ba Estadu atu kria kondisaun hodi asegura fasilidade saúde nian no bens no servisus tenke disponível iha fatin ne’ebé ema hot–hotu populasaun nian bele hakbesik a’an ba ho seguransa, liu-liu ba grupu sira ne’ebé vulneravel ka marjinalizadu.
2. Husu ba Estadu, liu husi Ministériu Saúde bele servisu hamutuk ho Ministériu Obras Públika hodi asegura katak Postu Saúde sira iha Suku tenke asesu ba kanalizasaun Bee Moos.

• Setór Edukasuan ;

1. Husu ba Governu da-9 atu investe iha setor edukasaun hodi hadia infraestrutura bazika, bem estar profesor sira nian, hadia kurikulum.
2. Ministériu Edukasaun presijamente servisu hamutuk ho minstériu relevantes edukasaun nian atu haree ba asuntu sira edukasaun nian en jerál liu-liu ba problema edifisiu no infrestrura eskola sira nian, kanalizasaun bee ba eskola sira no saneamentu iha eskola ida-idak. Kanalizasaun bee maká sai hanesan problema seriu kuaze iha eskola barak.
3. Relasiona ho Programa Merenda Eskolár, Ministériu Edukasaun presija iha desizaun polítika ida di’ak atu fó prioridade ba asuntu saúde no hasae kualidade programa no fasilidade sira ne’ebe presija ba implementasaun Programa Merenda Eskolár lao ho di’
4. Presijamente Ministériu Edukasaun atu bele servisu hamutuk Ministériu Finansa hodi garante katak implementasaun Programa Merenda Eskolár labele atrazu  iha futuru mai. 

Dili, 13 Dezembru 2023

Mak Saran Lian

Portavos

Xefi Suku Fatuquero, Ermera